A jeni ndjerë ndonjëherë sikur është e pamundur të ruani paqen mes fëmijëve tuaj? Një minutë gjërat po shkojnë mirë dhe në minutën tjetër ka shpërthyer lufta! Aftësia më e rëndësishme për të mësuar në zgjidhjen e konfliktit është të mësosh për qëllimin e zemërimit, pse e ndiejmë atë dhe çfarë të bëjmë me atë ndjenjë të zemërimit.

Zemërimi shpesh ka një reputacion të keq për shkak të ndjenjave dhe emocioneve të forta që mund të shkaktojë. Por është e rëndësishme t’u mësoni fëmijëve se zemërimi është në fakt një mjet shumë i dobishëm për t’i ndihmuar ata të kuptojnë thelbin e asaj që i shqetëson dhe si të zgjidhin konfliktin në rrënjë të çështjes.

Dëshironi t’i mësoni fëmijët për qëllimin e zemërimit? Këtu janë disa parime që duhen rishikuar me fëmijët përpara se të ndodhë lufta e tyre e radhës.

1. Mësojini fëmijët për zemërimin si një emocion i shëndetshëm

Së pari, është e rëndësishme që fëmijët të kuptojnë se ndjenja e zemërimit nuk është një gjë e keqe. Është normale që fëmijët dhe të rriturit të zemërohen kur ndihen të lënduar sepse nuk trajtohen mirë, ose kur shohin diçka që nuk është e drejtë apo e vërtetë. Zemërimi, në vetvete, është një emocion i shëndetshëm dhe i drejtë – një emocion që Zoti na dha për një arsye. Perëndia kujdeset thellësisht për drejtësinë, kjo është arsyeja pse Ai na dha aftësinë për të gjykuar atë që është e drejtë . Zemërimi është zakonisht rezultat i një ndjenje padrejtësie dhe duhet trajtuar si një sistem paralajmërimi për një çështje më të thellë që po ndodh.

Për t’i mësuar fëmijët për qëllimin e zemërimit, gjëja e parë që duhet bërë kur shpërthejnë ndjenjat e zemërimit, është t’i ndihmoni ata të identifikojnë nëse po ndodh një padrejtësi. Kërkojuni atyre të përshkruajnë me qetësi atë që po ndiejnë me fjalë dhe të diskutojnë se çfarë ndodhi dhe çfarë mund të bëjnë për ato ndjenja.

2. Bibla na thotë të shmangim mëkatin kur zemërohemi.

Parimi tjetër për t’i ndihmuar fëmijët të mësojnë për zemërimin, është se Bibla na thotë të shmangim mëkatin kur zemërohemi. Vetëm për shkak se zemërimi është një emocion normal dhe i shëndetshëm, nuk do të thotë se mund të mëkatojmë. Efesianëve 4:26 thotë: “Zemërohuni dhe mos mëkatoni…” Pra, cilat janë mënyrat se si mund të mëkatojmë kur mërzitemi për padrejtësinë?

Mësojini fëmijët të shmangin 3 mënyrat se si zemërimi mund të çojë në mëkat

1. Zemërimi për shkak të ambicies egoiste

Ndoshta një nga mënyrat më të zakonshme se si zemërimi te fëmijët mund të çojë në mëkat, është përmes ambicies egoiste. Ata duan të bëjnë diçka, ose të shkojnë diku – kanë ambicie – por dikush nuk po i lejon ta bëjnë, prandaj janë të zemëruar. Ndoshta ata mendojnë se është e drejtë që duhet ta bëjnë këtë; ka raste qe edhe mund të kenë të drejtë! Bibla thotë se të zemërohesh për ambicjet egoiste është mëkat. Thjesht shikoni Jakobin 4, ku thotë se grindjet vijnë nga dëshira dhe mosmarrja e diçkaje, ose Filipianëve 2, ku thotë se nuk duhet të bëjmë asgjë nga ambicia egoiste.

Pra, si mund ta luftojmë zemërimin tek fëmijët për gjërat që duan të bëjnë por nuk munden? Duke ndërtuar gëzim përmes ndjeshmërisë. Në çdo rast, i mësoni një fëmije se si të kënaqet duke parë dikë tjetër që kënaqet duke bërë diçka, edhe kur ai vetë nuk mund ta shijojë përvojën.

Për shembull, ata mund të jenë të mërzitur ose të zemëruar që nuk mund ta bëjnë vetë një aktivitet si motra apo vëllai i tyre. Por sfidoni fëmijën që t’i lërë mënjanë ato ndjenja dhe të përqendrohet në gëzimin e dikujt tjetër. Ky lloj fokusi do ta ndihmojë fëmijën tuaj të ketë zemrën e Jezusit për të tjerët, në vend të ambicjeve egoiste.

2. Zemërimi për shkak të krenarisë

Filipianëve 2 tregon një mënyrë tjetër se si mund të mëkatojmë me zemërimin tonë duke e konsideruar veten më të rëndësishëm se dikë tjetër. Shumicën e kohës, ne jemi më të shqetësuar për atë që është e drejtë për veten tonë, dhe më pak të shqetësuar për atë që është e drejtë për të tjerët. Megjithatë, Jezui la shembullin e përuljes së vetvetes dhe të menduarit në radhë të parë për të tjerët. Pra, të jesh i shpejtë për t’u zemëruar sepse nuk trajtohemi në mënyrë të drejtë, nuk është mënyra se si Jezusi dëshiron që ne të përdorim ndjenjën e drejtësisë që Ai na dha.

Mësojini fëmijët për qëllimin e zemërimit duke shpjeguar se zemërimi i mirë – lloji i zemërimit që tregoi Jezusi – ndodh kur bëjmë një apel në emër të dikujt tjetër që nuk trajtohet mirë. Dhe ndërsa mund t’i bëjmë një thirrje vetes, duhet të jemi shumë të kujdesshëm që të mos e mendojmë veten më të mirë se kushdo tjetër. Duhet të jemi shumë të kujdesshëm që të mos lejojmë që zemërimi ynë të nxitet nga krenaria dhe egoizmi, më shumë se konsiderata vetëmohuese për të tjerët.

Përsëri, për t’i ndihmuar fëmijët të mësojnë këtë parim të zemërimit, ndihmojini fëmijët të kërkojnë mundësi praktike për të konsideruar dikë tjetër më të rëndësishëm se veten e tyre dhe më pas lavdëroni atë që e përuli veten dhe tregoi zemrën e Perëndisë. Për shembull, një fëmijë mund t’i ofrojë ndenjësen më të mirë në makinë vëllait ose motrës së tij, në vend që të shpërthejë në një grindje të zemëruar, sepse është radha e tij të ulet atje, ose mund të lejojë gjithashtu dikë tjetër të marrë zgjedhjen e parë të një kënaqësie.

Kudo që të jetë e mundur, ndihmojini fëmijët të kryejnë një eksperiment për të parë se sa më mirë ndihen kur zemra e tyre mbushet me bujari kundrejt egoizmit, duke i pyetur se si ndihen pas zgjedhjeve të caktuara. Ndihmojini të kuptojnë se kanë fuqinë për ta kthyer një moment zemërimi dhe padrejtësie ndaj vetes, në një moment gëzimi personal duke zgjedhur bujarinë. Kjo është mënyra më e mirë për të parandaluar që zemërimi për padrejtësinë të kthehet në mëkat.

3. Zemërimi i tepruar, i pakontrolluar

Një mënyrë e tretë që zemërimi kthehet në mëkat, është nëse nuk mbahet nën kontroll. Zemërimi mund të jetë i mirë, sepse na motivon të bëjmë diçka për padrejtësinë që shohim, por ai kurrë nuk duhet të marrë kontrollin e fjalëve dhe veprimeve tona ose të na bëjë që të sulmojmë të tjerët. Kur kjo ndodh, fokusi fiksohet më shumë te sjellja e zemëruar sesa te padrejtësia që e shkaktoi atë – edhe nëse zemërimi fillestar ishte i justifikuar! Ndihmoni t’u mësoni fëmijëve qëllimin e zemërimit duke u treguar atyre se si zemërimi jashtë kontrollit është në të vërtetë kundërproduktiv për të arritur drejtësinë që ata dëshirojnë.

Të kërkosh drejtësi për dikë tjetër është një përdorim i mirë i asaj ndjenje të zemërimit. Por mbani mend, siç thotë Bibla te Jakobi 4, në shumicën e rasteve, lufta ndodh sepse ne jemi egoistë – jo sepse po kujdesemi për të tjerët. Kur e mbajmë nën kontroll zemërimin tonë dhe e përdorim atë për mirë, ne përmbushim qëllimin e Perëndisë për zemërimin. Në fund të fundit, Perëndia ka zemërim të drejtë dhe ne mund të kemi gjithashtu zemërim të drejtë kur e përdorim emocionin si mjetin hyjnor dhe vetëmohues për të cilin ishte krijuar.

Merrni hapa për t’i mësuar fëmijët për qëllimin e zemërimit sot, dhe çdo ditë që do ju jepet mundësia. Sepse kur i ndihmoni fëmijët të mësojnë se si ta kanalizojnë zemërimin për mirë dhe jo mëkatin, ju do t’i kurseni atyre (dhe të gjithëve përreth tyre) shumë pikëllim në jetë.

Nga: Cef podcast Teach Kids

Copyrights: Child Evangelism Fellowship Inc ©

Të drejtat e autorit: Bashkësia e Ungjillizimit të Fëmijëve të Shqipërisë

For English, please follow the link: https://www.cefonline.com/articles/teach-kids-articles/teach-kids-the-purpose-of-anger-cef/

 

Lini një koment

Your email address will not be published.

{"email":"Email address invalid","url":"Website address invalid","required":"Required field missing"}

Abonohuni me email

Merrni njoftime tona për aktivitetet dhe postimet e reja.